Обично не давам љубовни совети. Во случајов ќе направам исклучок. Откачете ја Надица! – не се однесува на одредена Надица, со презиме и домашна адреса. Таа може да се нарекува и Надежда, Нада, или пак да се појави во машки облик, како на пример Надко. Сеедно, се работи за истата Надица, за нејзината суштина.
Кај повеќето, Надица е долгогодишна љубовница и одамна свила гнездо во нивното срце. Ненаметлива и без фанфари таа е секогаш при вас кога е најтешко. Верна е оваа љубовница. Ако за момент ве напушти, веќе во наредниот пак ќе ви се врати. Таа е утешителка. И веројатно сметате дека не можете да живеете без неа, без нејзината верност и љубовни дарови. Веројатно сметате дека ќе ве надвладее очајот доколку ја откачите Надица, дека без неа би биле беспомошни. И вонредно е тешко да го прифатите мојот љубовен совет. Особено кога сте во криза и кога вас ве откачиле сите. Кога пред вас се наоѓаат понекои, или сите заедно, од човековите зла што ги ослободи митската Пандора тогаш Надица ќе ве заведе со нејзината насмевка. Болести, чуми, војни, пороци и сите останати бедотии, заедно во иста кутија се скриле, а само Надица остана утеха и љубов да подаде. Зар не е ова малку сомнително? Што е причината, а што последицата? А што ако ја откачите Надица? Ако се откажете од нејзинато заводливо друштво?
Сомнежот ми падна на Надица. Сомнеж во нејзината љубов, добронамерност и верност. Во моментите на живот или смрт, во моментите на одлука, или пак во моментите кога блика животот во полна сила, Надица никаде ја нема. Ја нема тогаш со бакнеж да се јави, или барем прегратка да понуди. Додека пак, Надица е тука кога сте мали, кога вашата судбина не е во вашите раце, или така си мислите. Надица е тука за страшливците, за незнајковците, за слабаците. За робјето! Мислите дека е тука од благородни причини, од љубов, но таа е тука да ве окова во системските ланци. Неверница е Надица. Посесивна блудница. Флертува во исто време со милиони други. И бидете сигурни, таа воопшто не ве сака. А каде би одела таа доколку го нема во нас страшливецот, игнорантот?
Да расчистиме уште една работа. Се наметнува погрешна слика за трите друшки кои одат рака под рака, Љубица, Верица и Надица. Љубица е идеалистка. Љубовта со неа е органска, доаѓа од внатрешноста на секоја клетка. Љубов чиста, неусловена. Љубица сама ќе ви пријде, ќе ве освои. Кога ќе се случи тоа останува само да се препуштите без колебање и размислување. Без разум, а со срце е љубовта на Љубица.
Љубовта со Верица може да ви понуди многу, бескрајно многу. Но Верица има сестра близначка. Верица и лажната Верица. Колку со Верица може да се воздигнете во љубовта, толку со лажната Верица може да пропаднете во љубовната бездна. Како да препознаете која Верица е вистинската, а која лажната? Има неколку особености кои помагаат во препознавањето. Верица ја сака интимата во љубовниот чин. Никогаш не ви се предава од прва. Таа ќе ви предложи да се најдете на некое за неа интимно место. Доклку сте истрајни во трагањето Верица ќе ве пречека со раширени раце. Љубовните плодови по долгата потрага се вкусни и бесценети. Потрагата може да трае неколку години. Можеби ќе поминете неколку планини и долини, но вистинската Верица ќе ви помогне, ќе остави неколку траги, марамчиња или камчиња попат. Лажната Верица ќе побара да ја барате на некое непостоечко бајковито место. Можеби ќе ви предложи да ја најдете на едниот крај на небото, на некое розево безвремено рајско место. Или пак ќе ви каже дека ве чека на другиот крај од небото заедно со уште сто девици. Вистинската Верица не ја сака толпата. Овој пат ќе мора да го изодите воглавно сами. Помошта и советите се добредојдени, но Верица ќе ја пронајдете сами. Доколку Верица ви ја местат стројници, пријател(к)и, учени професионалци или било кој друг, тоа е сигурен знак дека се работи за лажната Верица. До Верица нема кратенки, нема организиран превоз со автобуси. Вистинската Верица не ја сака хиерархијата.
Сега кога ги запознавме прекрасните Љубица и Верица, се прашувам, како ли само во нивно друштво се најде Надица? Направете споредба. Неусловената љубов од срце за Љубица со ситноразумското калкуланство во љубовта на слабаците за Надица. Верица ве сака сам, а Надица флертува со милиони. Верица е во љубов со храбрите и истрајните, а Надица во љубов со страшливците. Надица дефинитивно не припаѓа во ова друштво. Надица е за оние што цимолат. Жалопојки на возрасните деца. Надица е за плачковци. Можеби овој совет ќе помогне во разбирањето и практикувањетона љубовта, доколку сеуште не сте го сториле тоа, – Откачете ја Надица!
Technorati Tags: Надица, Верица, Љубица
